Pas më shumë se një ore, ka përfunduar takimi  i liderëve të koalicionit në ndërtesën e Qeverisë së Kosovës.

Në këtë takim, ku ishin të pranishëm kreu i AAK-së, Ramush Haradinaj, ai i NISMA-s, Fatmir Limaj, i pari i LDK-së, Isa Mustafa si dhe kryeministri i vendit Avdullah Hoti është diskutuar rreth dialogut me Serbinë dhe takimit që pritet të mbahet  në Shtëpinë e Bardhë në Uashington mes palës kosovare dhe serbe

Takimi pritet të mbahet  më 4 shtator, raporton Arbresh.info.

Kreu i NISMA-s, Fatmir Limaj pas përfundimit të takimit ka bërë të ditur se  në këtë takim është  diskutuar që Kosova të shkoj në takim vetëm për njohje reciproke.

Ndërsa sa i përket çështjes së Presidentit, Limaj tha se nuk ka qenë temë  diskutimi.

“Diskutuam për mbledhjen e 4 shtatorit. Kosova në takim shkon vetëm për njohje reciproke ashtu siç e kemi diskutuar edhe më herët dhe ashtu siç ia kemi bërë të ditur edhe ndërkombëtare. Çështja e presidentit nuk është diskutuar në këtë mbledhje. Koalicioni do të jetë stabil derisa të ketë korrektësi në mes të partnerëve”, u shpreh Limaj./arbresh.info/